ناز ات گیلن

سئوگیلیم بیر گول کیمی سن هر گئجه ناز ات گیلن 

 قوی کی من نازینله هی مدهوش اولوم ناز ات گیلن

 اولسا  هر  کیمده  سنین  تک  آیپارا ، آی دلبریم   

   دورماز هئچ بیر دیقه او سویلرکی سن  ناز ات گیلن

 کوی   عشقینده  دولانام  باشینا  پروانه  تک    

 اوندا   دینلرسم  سنی  سنده   منه  ناز ات  گیلن

گر کی توتسام من بی گون او ل زولفونون امواجینی    

  سویله مزدیم بیر کسه، آی گول ، منه ناز ات گیلن

آغلیمی باشدان آلیپسان سئودیگیم ، نازینله سن 

دوزمگ اولماز هئچ بو هجرانه،دو گل ناز ات گیلن

قاشلارون تک قاش مگر واردیر بو دونیاده گوزل 

  قاشلارون نازین چئکیم چکدیکجه من، ناز ات گیلن

 کیپریگین اوخدیر منیم بو قلبیمه آی اولدوزوم  

 نازووی اوخلا ائدیرسن عیبی یوخ ، ناز ات گیلن

گوزلرین دریا کیمی گویدیر، آغی، قاردیر جانیم    

 گوزلرین قوربانییم گوزلرله سن ناز ات گیلن

گوزلرین شکلین چکیم اوز قلبیمین دیوارینا    

شکلینی چکدیکجه من ، شکلینله سن  ناز ات گیلن

قرمیزی گولدیر یاناغون ،نار کیمی،آل قان کیمی  

 یاندیریپ یاخدین یاناغینلا منی  ناز ات گیلن

دوداغین بالدیر،شکردیر،غنچه گول تک باغدادیر 

  ماهنی سویله سن دوداقلارلا ،منه  ناز ات گیلن

صورتین گولدیر گونشدیر اوخشاییرسان سن آیا  

 آی تکین اوز سئودیگی آخشامه سن  ناز ات گیلن

کهلیگه اوخشار یریشلی جیرانیمسان سن منیم 

  ایستییردیم کی  یریشینله  منه   ناز ات  گیلن

*داملا*تک عاشیق گوریپسن سئودیگی زیباسینا  

 سئودیگی دریادی، دریا تک منه ناز ات گیلن

سئویرم سویلر هر عاشیق دلبر جانانینه    

  جانانیم سن اول شیرین سوزلرله سن  ناز ات گیلن

غمزه ایله گورسه دیرسن  سئودیگین دیلدارینی  

 سئودیگین سویلیر سنه، ناز ات گیلن  ناز ات گیلن

سنده هئچ یوخدورمو بیر اینصاف آی زیبا رخیم  

  من مریض عشقووم،گول سن منه  ناز ات گیلن

گور نجور توتساق اولوبدور* داملانین*قلبی سنه 

 دردیمین درمانی سنسن همدمیم، ناز ات گیلن

ناز ائدیپ نازینله* داملانین*گوزین قان ائت گیلن 

  آما بیتمزدیر سنه سئوداسی ، سن  ناز ات گیلن